Давлат томонидан тарқатилаётган кўмирнинг аҳолига етиб бориши юзасидан прокуратура ходимлари назорат тадбирларини ўтказган. Бу ҳақда Бош прокуратура матбуот хизмати хабар берди.

Қайд этилишича, назорат тадбирлар давомида «Кўмир таъминоти» МЧЖнинг Наманган вилоят филиали тасарруфидаги Учқўрғон тумани кўмир омбори мудири У.Н. куз-қиш мавсумида аҳолига имтиёзли нархларда тарқатишга мўлжалланган 623,7 тонна кўмирни талон-тарож қилгани аниқланган.

Шунингдек, юқорида келтирилган МЧЖнинг Фарғона вилоят филиали тасарруфидаги Бувайда кўмир омбори мудири А.И. ҳам аҳолига куз-қиш мавсумида имтиёзли нархларда тарқатилишга мўлжалланган 413,8 миллион сўмлик 1.364,3 тонна кўмирни фуқаролар олганлиги ҳақида сохта маълумот тайёрлаб, ўзи кўмирларни нақд пулга сотиб юборган. Маблағни эса шахсий манфаати йўлида ишлатиб юборган.

Мазкур ҳолатда икки омбор мудирига нисбатан ҳам жиноят иши қўзғатилиб, улар процессуал тартибда ушланган.

Ҳозирда тергов ҳаракатлари давом этмоқда.

Эслатиб ўтамиз, аввалроқ, Андижоннинг учта туманида аҳоли учун ажратилган қарийб бир миллиард сўмга яқин бўлган кўмир сотиб юборилгани хабар қилинганди.