Бугун, 6 ноябр куни ижтимоий тармоқларда ўз уйининг ҳовлисида ёш болани аёвсиз калтаклаётган аёл акс этган видео тарқалди.

Болалар омбудсмани берган маълумотларга кўра, ҳолат шу йилнинг 4 ноябр куни Наманган вилоятининг Янги Наманган тумани «Ёшлик» МФЙ Исломобод кўчасида яшовчи К.Х. томонидан содир этилиб, у ўзи яшайдиган уйнинг ҳовлисида 10 ёшли фарзанди С.М.ни калтаклаган.

Шундан сўнг, Наманган шаҳар ИИО ФМБ Янги Наманган тумани ИИБ тезкор тергов гуруҳи воқеа жойига етиб борган.

Маълумот учун, ҳозирда аёлнинг ушбу иши бўйича терговга қадар текширув ҳаракатлари ўтказилиб, вояга етмаган С.М.нинг олган тан жароҳати юзасидан тегишли тартибда судга оид тиббий экспертиза тайинланган. Ҳолат Болалар омбудсмани томонидан назоратга олинган.

Эслатиб ўтамиз, аввалроқ Хоразмда хусусий боғчалардан бирида болаларни калтаклаган тарбиячига чора кўрилганди. Бундан ташқари, Тошкентда икки ёшли болани калтаклаган аёл қидирилаётгани ҳақда хабар берилганди.