Янгикўрғон туманида 2023 йил 18 декабрь куни Ш.С. қонуний никоҳидаги хотини С.А.ни профилактика инспекторидан рашк қилиб, уч нафар боласининг кўз олдида калтаклади. Бу ҳақда Bugun.uz манбалари хабар берди.

Маълум қилинишича, эркак аёлини ургани учун 2024 йил 17 январда ҳам 1 700 000 сум жарима тўлаган. Шунга қарамасдан такроран, 2024 йил 28 март куни соат 22:30 да уйида аёлининг бошига ҳамда танасининг турли соҳаларига уриб, дўппослаб тан жароҳати етказган.

Судда эркак хотини ўзига ўзи тан жароҳати етказганини ва касалхонага ётганини айтди. Эркак айбига иқрор бўлмаган ва судда хотини оёғини столга уриб, эртаси куни касалхонага кетганини айтиб, кўрсатма берган. Бироқ жабрланувчининг қизларининг кўрсатмаларига кўра, суд судланувчининг важларини рад этган.

Тиббий экспертиза хулосасида С.А.нинг тан жарохатлари — иккала чакка, энса соҳаси, иккала елка ва билак, иккала сон ва болдир унг оёқ кафти бармоқлари соҳалари юмшок тўқималари лат егани аниқланган.

Суд Ш.С.га нисбатан базавий ҳисоблаш миқдорининг 25 баравари миқдорида 8 500 000 (саккиз миллион беш юз минг) сўм жарима жазоси тайинлади.