Bugun.uz маълумотларига кўра воқеа 2023 йилнинг 18 сентябр куни Уйчи тумани марказидаги деҳқон бозор чорраҳасида содир бўлган. Давлат рақам белгиси бўлмаган ва ойналари қорайтирилган ҳолда ҳаракатланиб кетаётган Гентра ҳайдовчисига ўша ҳудудда хизмат вазифасини олиб бораётган ЙПХ катта инспектори Э.Р. йўл четида тўхташ ишорасини қилган.

Бироқ, Gentra ҳаракатни давом эттиргани учун, уни тўхтатмоқчи бўлган инспектор Э.Р. машинанинг олд қисмига чиқиб олган. Ҳайдовчи эса ҳаракатни давом эттирган. Автомашина 25-30 км/соат тезликда 300 метр масофагача ҳаракатланиб борган.

Ҳайдовчи 20 ёшли Олимжонов Абдураҳмон экани аниқланиб, унга нисбатан жиноят иши очилиб, иш судда кўриб чиқилган. Суд мажлисида айбига иқрорлигини ва пушаймонлигини билдирган А.О.га кўра, унинг бундай қилишига инспекторнинг қўполлик билан сўкингани сабаб бўлган.

ЙПХ инспектори Э.Р.нинг айтишича, шу куни ҳамкасби у томонга рақамсиз автомашина ҳаракатланиб кетаётганини айтган, у эса ушбу машинанинг светафорда тўхтатб турганини кўрган ва ҳужжатларини текшириш учун тўхтатишга уринган. Бу пайтда яшил чироқ ёниб, автомашина ҳаракатланишга тушган. Шунингдек, жабрланувчи инспектор ҳозирда О.А.га нисбатан даъвоси йўқлигини билдирган.

Суд барча материалларни ўрганиб чиқиб, судланувчи О.А. ни ЖКнинг 219-модда (Ҳокимият вакилига ёки фуқаровий бурчини бажараётган шахсга қаршилик кўрсатиш) билан айбли деб топган ва унга нисбатан 3 йил муддатга озодликдан чеклаш жазосини тайинлаган.

О. А. 29 сентябрдан буён эҳтиёт чораси сифатида қамоқда сақланиб келган ва ушбу кунлар жазо муддатидан чегириб ташланиши белгиланган.