Наманган вилояти Учқўрғон туманидаги 2-мактаб ўқитувчиси Дилшод Мухторов синф хоналарини ўз ҳисобидан жиҳозлади. Бу ҳақда вилоят мактабгача ва мактаб таълими бошқармаси ахборот хизмати хабар берди.

Қайд этилишича, педагогнинг ўқувчилари ҳар йили фан олимпиадаларида фаол иштирок этиб келади. Жумладан, собиқ битирувчи Ҳожиакбар Муродуллаев информатика мусобақасида иштирок этиб, грант асосида ўқишга кирган.

Шунингдек, «Robot-uz 2023» халқаро олимпиадасида таълим муассасасининг 6-синф ўқувчилари жамоа ҳисобида 2-ўринни эгаллаган. Педагогик фаолияти орқасидан 12 миллион сўм маош олаётган мутахассис мактабда хайрли ишга қўл урган.

«Ўқувчиларнинг пухта билим олиши ва IT соҳасидаги кўникмаларини чуқур ўзлаштириши учун информатика ва робототехника хоналарини ўз ҳисобидан замонавий 16 дона парта, 40 та стул ва бошқа жиҳозлар билан таъминлади. Бу эса ёшларнинг билим олишга бўлган иштиёқини янада ортишига замин яратади», — дейилади хабарда.