Навоий вилояти Кармана туманида юрист фуқарога арзон нархда 2,1 гектар ер олиб бериш эвазига пора талаб қилди. Бу ҳақда Иқтисодий жиноятларга қарши курашиш департаменти ахборот хизмати хабар берди.

Маълум бўлишича, департаментнинг Навоий шаҳар бўлими томонидан ДХХ ва ИИБ ходимлари билан ҳамкорликда тезкор тадбир ўтказилган. Навоий вилояти кичик ва ёшлар саноат зоналарини бошқариш бўйича ягона дирекцияси юрисконсульти Р.Х. (муқаддам судланган) фуқаро Ж.Р.нинг ишончига кириб, Кармана тумани Янгиариқ МФЙда жойлашган кичик саноат зонаси ҳудудидаги 2,1 гектар ерни олиб беришда ёрдамлашишини ваъда қилган.

У ер майдонини «Е-аукцион» электрон платформаси орқали арзон нархда харид қилиб, унинг номига расмийлаштириб бериши эвазига 93 миллион сўмни олган вақтида ашёвий далиллар билан ушланган. Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.