Блогер Улуғбек Шодибеков дўсти Фарҳод Манноповнинг ўлимидан сўнг илк марта интервю бериб, Фарҳод Манноповнинг операцияда уч марта юраги тўхтаб қолгани, деярли ҳамма аъзоси ишдан чиқиб бўлгандан кейин орадан 5 соат ўтиб, оиласига хабар берилганини кескин танқид қилиб чиқди.

Улуғбек Шодибековнинг айтишича, Фарҳод бурни cинган куниёқ Star Med клиникасига бориб, шифокорга учрашган, эртаси куни эса операция қилинадиган бўлган. Блогер Дубайга сафари режалаштирилгани сабаб операцияни тезлатишни сўраган. Шифокор ҳам бунга рози бўлган. Улуғбек интервюда агар шифокор бу жароҳат билан тезда операция қилиб бўлмаслиги, яхшилаб текшириш зарурлигини айтганида, кутиш мумкинлигини маълум қилган.

«Операция бўладиган кун эрталаб соат 8:30 ларда Фарҳодга телефон қилдим. У ҳозир анализ топшираман, сен соат 11:00 лар атрофида шифохонага кел, деди. Мен 11 да бордим. Кулгили видеолар олдим, устидан кулдим. Жума куни эди, жума намозигача ёнида бўлдим. Кейин кетдим. Қайтсам, аллақачон операцияга кириб кетган экан. Телефонимга чиққанимдан кейин видеолар оласан, деб SMS ёзган. Соат 13:30 эди, 15:00 ларда чиқиши керак экан. Шифохонанинг ёнида кутиб ўтирдим. Онаси, рафиқаси ва мен, бошқа ҳеч кимга хабар бермаганмиз. Соат 15:00, 16:00, 17:00, 18:00 ва 19:00 бўлди ҳам чиқмади. Ёрдамчисига телефон қилсам, бошқа беморлари келиб қолди, шунинг ҳисобига операция чўзиляпти деди. Ҳайрон қолдим, ўзи операцияда бўлса, бошқаси келса, унга ҳам қарайдими дедим. Яна кутдик, охири соат 20:30 да онаси нима бўляпти ўзи, деб қўярда қўймай сўради. Кейин комага тушганини айтишди».

Улуғбек Фарҳод операция бошлангандан кейин 1,5 соат ўтиб, кома ҳолатига тушгани, унда аллергия кузатилганини айтган. Асл вазият унинг яқинларига орадан 5-6 соат ўтиб маълум қилинган.

«Комага тушганини эшитиб, операция хонасигача югуриб кирдим. Унинг ётган ҳолатини сўз билан тасвирлаб беролмайман. Ўзимни ушлаб туролмадим, йиғлаб юбордим. Сен яшашинг керак, онанг учун яша, жамоамиздаги энг кучлисисан , қайт, жигар, қайт дедим. Энг алам қилгани: уни комада эканини 5 соатдан кейин айтишгани бўлди. Вақтида айтишганида биз бошқа шифокорларни олиб келардик. Тўғри, бу ажал, лекин нима учун вазиятни бошида айтишмади. Фарҳоднинг юраги 3 марта тўхтаб қолган, ҳамма организми тўхтаганидан кейин бизга айтишяпти. Соат 21:00 лар атрофида тажрибали шифокорларни олиб келишни бошладик. Келган шифокор техникалар номини айтяпти, дориларни айтяпти, йўқ бўлиб чиқяпти. Фарҳоднинг юраги неччи минутдан тўхтаб қолганини сўраяпти. 1-2 минут деябди, аниқ жавоб беролишмаяпти. Ҳатто иссиғи чиққанини кеч билиб қолишган, кейин давленияси чиққан, уни тушириш билан оввора бўлишган, бу орада ўпкага қон кетган. Ўпкага қараймиз деб, иссиғига эътибор беришмаган. Иссиғи 42 даражагача кўтарилиб кетган. Ўпка, жигар, буйрак ва юракни уч марта ишдан чиқариб, кейин бизга хабар қилишган».

Улуғбек бу жараён 37 соат давом этгани ва ҳар ярим соатда «Пахтакор» метро бекатига қатнаб, Фарҳоднинг қонини текширтириб, жавобини шифокорларга етказгани ва ҳолат эрталабгача давом этганини айтди. Эрталабга яқин эса Фарҳоднинг аҳволи бир оз яхшиланган. Аммо Улуғбек дўстини операция қилган шифокорлар вазиятни бошиданоқ айтмаганидан аламзада экани ва охирига бориб, ҳатто ҳаракат ҳам қилмаганини айтди.

«Шифокорларнинг ҳеч бири ташқаридан олиб келиш керак бўлган техникалар учун ҳаракат қилмади. Ташқаридан техникани ҳам, шифокорларни ҳам, тез ёрдамни ҳам ўзимиз олиб келдик. У ерда бизга зўр режалаштирилган театр қўйиб беришди. Ҳамма нарсани ўзига керакли пайтда кетма-кет айтишди. Қачон жони узилиши ҳам маълум эди. Фақат бизни югурганимиз, ҳаракат қилганимиз қолди».

У Фарҳодни операция қилган шифокорлар қамалмагани ва ҳозир «морг» жавоби чиқишини кутишаётгани ҳақида ҳам тўхталиб ўтди. Унинг айтишича, шифокорларга қўйиладиган айблов «морг» жавобига боғлиқ бўлади.

«Шифокорларнинг қамалмаганига асосий сабаб айб айнан қайси шифокорда эканини билиш керак. Бу лорни айби билан бўлдими ёки анестезиологними, буни билиш учун ‘морг’нинг жавобини кутишимиз керак экан. ‘Морг’ ўлимга ‘анафилактический шок’ (анафилактик шок — бу аллергиянинг ўткир клиник кўриниши ҳисобланади. У билан дуч келган одам шошилинч тиббий ёрдамга муҳтож, акс ҳолда ўлим хавфи юқори бўлади) сабаб бўлганини айтди. Энди бу яна текширилади ва камида 15 кун ичида аниқ жавоби айтилади. Шунга қараб шифокорларга чора кўрилади».

Улуғбек оддий бурун операцияси сабаб жарроҳлик хонасидан одамнинг ўлиги чиқишини «медицина» айби деб баҳоламоқда.

Маълумот учун, MittiVine тахаллуси билан ижод қилиб келган таниқли вайнер Фарҳод Маннопов бассейнда бошидан ва бурнидан жароҳат олиб, операция қилинган. Аммо операциядан сўнг комага тушиб, ўзига келмай 5 мартга ўтар кечаси вафот этган. Бош прокуратура томонидан блогернинг вафоти юзасидан Жиноят кодексининг 116-моддаси (касб юзасидан ўз вазифаларини лозим даражада бажармаслик) билан жиноят иши қўзғатилган.