Ўзбекистоннинг Лондондаги элчихонасида Буюк Британиянинг қишлоқ хўжалиги соҳаси масъуллари билан учрашув бўлиб ўтди.

Унда Буюк Британия Бизнес ва савдо вазирлиги етакчи мутахассиси Светлана Коллиер, Қишлоқ хўжалиги ва генетика технологиялари ташкилоти ҳузуридаги (UK TAG) Агротехнологиялар экспорти жамияти директори Крис Жексон ҳамда «Export Certification Limited» (UKECP) компанияси ветеринария бўйича маслаҳатчиси Роб Гринналл қатнашди.

Британия вакиллари UKTAG ва UKECP фаолияти тўғрисида батафсил маълумот тақдим этдилар. Шунингдек, чорвачилик методологияси, генетикаси ва агротехнологиялар соҳаларида Ўзбекистоннинг тегишли вазирлик ва идоралари билан яқин ҳамкорлик алоқаларини ўрнатишга қизиқиш билдирилди.

Бундан ташқари, Ўзбекистон қишлоқ хўжалиги, хусусан чорвачилик соҳалари ходимларининг малакасини оширишда ўзаро тажриба алмашиш, онлайн тренинг ва маслаҳатлашувларни ўтказиш таклифи илгари сурилди.

Томонлар жорий йил июль ойида Британиянинг Мальверн шаҳрида бўлиб ўтадиган «NSA Sheep Event» халқаро кўргазмасида ўзбек фермерлари ҳамда ҳамкор ташкилотларининг иштирокини ташкил этиш масалаларини ҳам муҳокама қилди. Учрашув якунида «Export Certification Limited» компаниясининг ветеринария бўйича маслаҳатчиси Роб Гринналлнинг шу йил 5-6 март кунлари Ўзбекистонга ишчи сафарини уюштириш юзасидан келишиб олинди.