Экология, атроф-муҳитни муҳофаза қилиш ва иқлим ўзгариши вазирлигида Экология вазири Азиз Абдуҳакимов ва Германия ҳукуматининг иқлимни муҳофаза қилиш бўйича махсус вакили, Германия ташқи ишлар вазирлиги штат котиби Женнифер Морган хоним ўртасида учрашув бўлиб ўтди.

Учрашувда томонлар ўртасида ҳамкорликни янада ривожлантиришга қаратилган қатор масалалар ва янги ташаббуслар муҳокама қилинган. Хусусан, Марказий Осиё атроф-муҳит ва иқлим ўзгаришини ўрганиш университети (Central Asian Green University)нинг ўрмон хўжалиги, гидрометеорология ва иқлим билан боғлиқ бўлган муассасалар учун пойдевор ташкилот эканлиги таъкидланган.

Учрашувда А.Абдуҳакимов PM2.5 зарраларига эътибор қаратган ҳолда йирик шаҳарлар ҳавосининг ифлосланишига қарши курашиш бўйича ҳукумат қарорлари ва стратегиялари билан ўртоқлашди, шунингдек, ҳаво сифати муаммосининг оммавий ахборот воситаларида кенг ёритилишига тўхталган. Атроф-муҳитни муҳофаза қилиш бўйича муҳокамаларда оммавий ахборот воситалари орқали жамоатчилик иштироки ҳамда фуқароларнинг хабардорлигини ошириш зарурлиги қайд этилган.

Ўз навбатида, Женнифер Морган хоним Ўзбекистоннинг экология соҳасидаги ташаббусларини юқори баҳолади ва илм-фан, таълим, экологик муаммоларни ҳал этишда ҳамкорликни янада ривожлантиришга умид билдирган.

Шунингдек, учрашувда ностандарт бензиннинг ҳаво сифатига таъсирига эътибор қаратилган. Бундан ташқари, вазир «Яшил макон» умуммиллий лойиҳаси доирасида кўкаламзорлаштириш ташаббуслари ҳақида маълумот берган. Шу билан бирга, мамлакатдаги институционал ва сиёсий ўзгаришларга ҳам тўхталиб ўтилган. Бу экологик сиёсат бўйича асосий мувофиқлаштирувчи орган сифатида Президент ҳузуридаги Иқлим кенгашини тузиш тўғрисидаги қарордир. Кенгашнинг ижро этувчи органи сифатида Миллий иқлим марказининг роли қайд этилган.

Қолаверса, Экология вазири маслаҳатчиси Суна Парк ҳар бир бўлимда вазирлик томонидан мувофиқлаштириладиган экологик дипломатия бўлими ташкил этиш, 2030 йилгача иқлим ўзгариши бўйича ягона сиёсат ва миллий стратегияни ишлаб чиқиш режалари билан ўртоқлашган.

Шу билан бирга, Марказий Осиёда экологик барқарорликни таъминлаш ва Германия халқаро ҳамкорлик жамияти (ГИЗ)нинг «Яшил Марказий Осиё» ташаббуси доирасидаги минтақавий ҳамкорликнинг юқори аҳамиятга эга эканлиги таъкидланган.

Учрашув кун тартибидан ЕТТБ билан стратегик ҳамкорлик масалалари ва Марказий Осиё учун Экологик фондни яратиш режалари ҳам ўрин олган.

Якунда Германия томонига COP14 — Ёввойи ҳайвонларнинг кўчиб юрувчи турларини сақлаш бўйича Конвенция иштирокчилари конференциясининг 14-йиғилиши ва Самарқанд иқлим форуми ҳақида маълумот берилди ва Германия делегацияси ушбу тадбирларга таклиф қилинган.