Шавкат Мирзиёев 19 февраль куни «Буюк туркман шоири ва мутафаккири Махтумқули Фироғий таваллудининг 300 йиллигини кенг нишонлаш тўғрисида»ги қарорни имзолади. Бу ҳақда ЎзА хабар берди.

Қатоқ вазирлик, академия ва қўмиталар ҳамда жамоатчилик вакилларининг буюк туркман шоири ва мутафаккири Махтумқули Фироғий таваллудининг 300 йиллигини мамлакатда кенг нишонлаш тўғрисидаги таклифлари маъқулланди.

Махтумқули Фироғий таваллудининг 300 йиллигини нишонлаш бўйича ташкилий қўмита таркиби иловага мувофиқ тасдиқланди. Ташкилий қўмита икки ҳафта муддатда Махтумқули Фироғий таваллудининг 300 йиллигини юқори савияда нишонлаш бўйича чора-тадбирлар дастури тасдиқлайди.

Чора-тадбирлар дастурида:

• Махтумқули Фироғийнинг «Танланган асарлар»и ҳамда унинг ҳаёти ва ижодий фаолиятига бағишланган илмий мақолалар тўпламини нашрга тайёрлаш ва чоп этиш;
• давлат буюртмаси асосида Ўзбекистон ва Туркманистон кино усталари ҳамкорлигида Махтумқули Фироғийга бағишланган бадиий фильм яратиш;
• шоир ҳаёти ва ижодий фаолияти ҳақида спектакль саҳналаштириш;
• ёш хонандалар ўртасида «Махтумқули шеърлари билан айтиладиган энг яхши қўшиқлар ижрочиси» республика танловини ўтказиш;
• Бадиий академиянинг марказий кўргазмалар залида ўзбек ва туркман халқларининг дўстлик ва қардошлик алоқаларини тараннум этувчи тасвирий санъат асарлари кўргазмасини ташкил этиш;
• Хива шаҳрида Фанлар академияси, Ёзувчилар уюшмаси, Хоразм вилояти ҳокимлиги ва бошқа тегишли вазирлик ва идоралар билан ҳамкорликда «Махтумқули ижодининг ўзбек адабиёти ва санъатида тутган ўрни» мавзусида халқаро илмий конференция ўтказиш;
• мамлакатимиздаги олий ва ўрта махсус, касб-ҳунар, умумий ўрта таълим ташкилотлари, ҳарбий қисмлар, меҳнат жамоалари ҳамда маҳаллаларда таниқли шоир ва ёзувчилар, олимлар иштирокида учрашувлар, адабий кечалар ташкил этиш;
• 2024 йил октябрь ойида Алишер Навоий номидаги Ўзбекистон давлат академик катта театрида Махтумқули Фироғий хотирасига бағишланган ижодий кеча ўтказиш тадбирлари белгиланган.

Мазкур қарорда назарда тутилган чора-тадбирларни молиялаштириш тегишли вазирлик, идора ва ташкилотларга ажратилган буджет маблағлари, уларнинг буджетдан ташқари маблағлари ҳамда қонунчилик ҳужжатлари билан тақиқланмаган бошқа манбалар ҳисобидан амалга оширилиши белгиланган.