Ўзбекистонда шошилинч ёрдам кўрсатиш учун «112» ягона диспетчерлик хизмати ташкил этилади. Бу ҳақда Ҳуқуқий ахборот канали хабар берди.

Маълум қилинишича, «112» ягона диспетчерлик хизмати фаолиятини ташкил этиш тўғрисида”ги Ҳукумат қарори (304-сон, 29.05.2024 й.) қабул қилинди.

Қарорга кўра, ҳодиса ва фавқулодда вазиятлар рўй берганда шошилинч ёрдам кўрсатиш учун «112» қисқа рақам орқали фуқароларнинг чақирувларини қабул қилиш ва автоматлаштирилган тарзда қайта ишлаш имконини берувчи ягона диспетчерлик хизмати ташкил этилади.

«112» ягона диспетчерлик хизмати:

• Ички ишлар вазирлигининг;
• Фавқулодда вазиятлар вазирлигининг;
• Соғлиқни сақлаш вазирлигининг;
• Ўзбекистон Республикаси Президенти ҳузуридаги Ижтимоий ҳимоя миллий агентлигининг;
• «Ҳудудгазтаъминот» акциядорлик жамиятининг

шошилинч хизматларини маълумотларни узатишнинг ягона тармоғига бирлаштирган ҳолда республиканинг барча ҳудудлари бўйича шошилинч ёрдам чақириқларини қабул қилиш ва қайта ишлаш, аҳолига шошилинч ёрдам кўрсатиш фаолиятини бошқаришнинг ягона тизими ҳисобланади.

Шунингдек, қуйидагилар «112» ягона диспетчерлик хизматининг асосий вазифалари этиб белгиланди:

• фуқароларнинг чақирувларини қабул қилиш ва автоматлаштирилган тарзда қайта ишлаш, уларга бепул асосда шошилинч, тез ва кечиктириб бўлмайдиган ёрдамни ташкил этиш ва кўрсатиш;
• шошилинч ёрдам кўрсатишни бошқариш ва мувофиқлаштириш;
• вазирлик ва идораларнинг шошилинч хизматлари томонидан фуқароларга ўз вақтида ёрдам кўрсатилиши юзасидан тизимли назорат юритиш;
• вазирлик ва идораларнинг шошилинч хизматлари ўртасида яқиндан ахборот алмашинуви бўйича тезкор ўзаро ҳамкорликни таъминлаш.

Бундан ташқари, «112» ягона диспетчерлик хизмати қуйидаги муддатларда босқичма-босқич ишга туширилади:

• 2024 йил 1 июндан Тошкент шаҳри ва Тошкент вилоятида;
• 2024 йил биринчи ярим йиллигида Андижон, Наманган ва Фарғона вилоятларида;
• 2024 йил якунига қадар Қорақалпоғистон Республикаси ва қолган вилоятларда.