«Ўзгидромет» мамлакатда 2023 йил апрел ойида ўртача ҳаво ҳарорати меъёр атрофида, баъзи жойларда ўртача йиллик қийматлардан бир оз кўп бўлиши ҳақида маълум қилди. Ушбу ойда ёғингарчилик кам, баъзи жойларда меъёр атрофида бўлиши кутилмоқда.

Ой қуруқ ва илиқ об-ҳаво билан бошланади. 1 апрел куни Ўзбекистоннинг барча ҳудудлари бўйича ҳаво кам булутли бўлади, кундузги ҳарорат март ойининг охирги кунлари каби 22–27 даража атрофида, яъни меъёрдан 5–8 даражага юқори бўлади.

2–7 апрел кунлари республика бўйича беқарор об-ҳаво бўлиши кутилмоқда, баъзи жойларда шамол шиддатли кучайиши билан қисқа муддатли, момақалдироқли ёмғир ёғади. Кўпинча баҳорда бўлгани каби ёмғирнинг ҳудуд бўйича тарқалиши ва жадаллиги жуда ранг-баранг – ёмғирнинг жадаллиги ўртачагача бўлади. Кундузги ҳаво ҳарорати ёмғир пайтида 5–7 даражага пасаяди. Апрел ойининг биринчи ўн кунлиги охирида асосан ёғингарчиликсиз об-ҳаво бўлиши кутилмоқда ва ҳаво ҳарорати яна кўтарила бошлайди.

«Ўзгидромет»нинг дастлабки прогнозига кўра, апрел ойининг иккинчи ва учинчи ўн йилликларида ҳарорат кечалари 7-12 даражадан 12-17 даражагача, кундуз кунлари 20-25 даражадан 27-32 даражагача ўзгариб туриши кутилмоқда.

Маълумот учун, баҳорда ва хусусан, апрел ойида об-ҳаво баъзан жуда «кутилмаган ҳодисалар»ни: совуқ, кучли ёмғир, момақалдироқ пайтида тез-тез содир бўладиган қасирғалар, дўл олиб келади. Кучли ёмғирлар тоғолди ҳудудларда ҳалокатли сел-сув тошқинларига олиб келиши мумкин.

Баланд тоғларда ҳали ҳам қор кўчкиси хавфи сақланиб туради.