Эксклюзив, махсус ҳуқуқлар ва ваколатлар бекор бўлса, «темир тартиб» бузиладику, деб хавотирга тушманг, деб ёзмоқда иқтисодчи Отабек Бакиров. Тўғри, шу монополистик режимлардан ўн йиллар давомида бенефит олиб келган кимларнингдир комфорти издан чиқади, лекин ниҳоят нормал давлатлардаги каби регуляция ва лицензиялаш қоидалари ишга тушади.

Демак, 2025 йил 1 январдан бошлаб:

• қора ва рангли металл ломи ва чиқиндиларини тайёрлаш (харид қилиш), қайта ишлаш ва реализация қилиш, шунингдек, табиий газ ва электр энергиясининг улгуржи ва чакана савдо фаолиятларини лицензиялаш тартиби жорий этилади. Бунинг учун 2024 йил 1 сентябрга қадар қора ва рангли металл ломи ва чиқиндиларини тайёрлаш (харид қилиш), қайта ишлаш ва реализация қилиш, шунингдек, табиий газ ва электр энергиясининг улгуржи ва чакана савдоси тартибини назарда тутувчи норматив-ҳуқуқий ҳужжатлар лойиҳалари ҳукуматга тақдим этилиши керак;
• мобил ва (ёки) симли телекоммуникация тармоқларига эга Ўзбекистон Республикаси ҳудудида фаолият юритадиган телекоммуникация операторларига тезкор-қидирув фаолияти, ахборот ва киберхавфсизлик тизимлари талабларига тўлиқ риоя қилган ҳолда синов тариқасида халқаро Интернет тармоқларига ўз тижорат эҳтиёжлари учун тўғридан-тўғри уланиш ҳуқуқи берилади. 2024 йил 1 октябрга қадар халқаро Интернет тармоқларига ўз тижорат эҳтиёжлари учун тўғридан-тўғри уланиши ва босқичма-босқич бошқа операторларга халқаро Интернет каналларини ташкил этиш бўйича хизматларни кўрсатиш тартиби тасдиқланиши керак.

2026 йил 1 январдан бошлаб биржа савдоларида сотиб олинган мис катоди ва мис катанкасини экспорт қилишга чекловлар бекор қилинади. Экспорт қуйидаги шартларда амалга оширилиши мумкин бўлади:

• харид қилинган мис катоди ва мис катанкаси харид нархига белгиланган чегирма ҳамда хўжалик юритувчи субъектларга нисбатан тўловни кечиктириш имтиёзи қўлланилмайди;
• мис катоди ва мис катанкасини «экспорт» божхона режимига жойлаштириш учун унинг экспортга йўналтирилган ҳажмига нисбатан биржа савдолари харид нархига қўлланилган чегирма суммаси қайтарилганлиги ҳамда тўловнинг кечиктирилган қисми тўлиқ тўланганлиги тўғрисида Ўзбекистон Республика товар-хомашё биржасининг маълумотномаси тақдим этилади.