Президентнинг «Ўзбекистон – 2030 стратегиясини Ёшлар ва бизнесни қўллаб-қувватлаш йилида амалга оширишга оид давлат дастури тўғрисида»ги фармони қабул қилинди. Ҳужжат матни ЎзАда эълон қилинди.

Унга кўра, 2024 йил 1 мартдан бошлаб «Ҳар бир маҳалладан икки нафар дастурчи» дастури жорий этилади. Бунда, ушбу дастур доирасида:

• маҳаллаларда ёшлар етакчилари томонидан маҳалла фаоллари иштирокида ахборот технологиялари ва компьютер дастурлаш соҳасига қизиқувчи ёшлар аниқланиб, уларни инглиз ва бошқа хорижий тилларга ўқитиш ҳамда сертификатлар олишини ташкил этиш, сертификат олган ёшлар тўғрисида маълумотларни Рақамли технологиялар вазирлигининг махсус ахборот тизимига киритиб бориш амалиёти жорий қилиниши;
• рақамли технологиялар вазирлиги, Камбағалликни қисқартириш ва бандлик вазирлиги томонидан махсус ахборот тизимига киритилган ёшларни ИТ соҳасида фаолият юритаётган ташкилотларга йўналтириш ва ишга жойлаштиришга кўмаклашиш чоралари кўрилади.

Ушбу банднинг банднинг бажарилиши учун масъуллар этиб Ўзбекистон маҳаллалари уюшмаси, Ёшлар ишлари агентлиги, Рақамли технологиялар вазирлиги ҳамда Қорақалпоғистон Республикаси Вазирлар кенгаши, вилоятлар ва Тошкент шаҳар ҳокимликлари белгиланган.