Ўзбекистонда имтиёзли таълим кредитлари учун 183,8 миллиард сўм ажратилди. Бу ҳақда Иқтисодиёт ва молия вазирлиги матбуот хизмати хабар берди.

Маълум қилинишича, 2024 йил I чораги давомида имтиёзли таълим кредитлари учун 183,8 миллиард сўм ажратилган. Мазкур кредитлар билан 22 151 нафар талаба қамраб олинган. Кредитларнинг катта қисми, яъни 80 фоизи хотин-қизларга берилган — 17 830 нафар талаба бу имкониятдан фойдаланган.

Шунингдек, «Talim-krediti.mf.uz» платформасида Олий таълим вазирлиги ҳамда хизмат кўрсатувчи тижорат банкларининг 6 таси билан электрон ахборот алмашинуви йўлга қўйилиши натижасида таълим кредити ажратилган 141 минг нафар талабанинг электрон маълумотлар базаси шакллантирилган.