Қашқадарё, Сурхондарё, Самарқанд, Жиззах, Тошкент вилояти ва Наманган вилоятининг айрим ҳудудларида қор кўчиш хавфи эълон қилинди. Бу ҳақда Ўзгидромет ахборот хизмати хабар берди.

Маълум қилинишича, 7-8 февраль кунлари А-373 «Тошкент – Ўш» автойўлининг «Қамчиқ» довонидан ўтган қисмида қор ёғиши, вақти-вақти билан кучли ёғингарчилик ва туман кузатилиши, кўринувчанлик 50 м гача пасайиши, шамол тезлиги 15-20 м/с гача кучайиши оқибатида автойўлда яхмалак ва қор уюмлари юзага келиши мумкин.

Шунингдек, 6-12 февраль кунлари кутилаётган ёғингарчилик ҳамда ҳаво ҳароратининг ўзгариши сабабли республиканинг тоғли ҳудудларида, жумладан:    

• Қашқадарё вилояти: Дехқонобод, Китоб, Қамаши, Шаҳрисабз туманларида;     
• Сурхондарё вилояти: Бойсун, Қумқўрғон,Сариосиё, Узун туманларида;     
• Самарқанд вилояти: Булунғур, Нуробод, Қўшробод, Самарқанд, Ургут туманларида;     
• Жиззах вилояти: Бахмал, Зомин туманларида;     
• Тошкент вилояти: Бўстонлиқ, Паркент, Оҳангарон туманлари (Чотқол тизмаси тоғлари);     
• Наманган вилояти: Поп туманида қор кўчиш хавфи элон қилинади.

«Тоғли ҳудудларда истиқомат қилувчи фуқаролар, дам олувчилар ҳамда тоғли ҳудудларда ҳаракатланувчи ҳайдовчилардан, эҳтиёткорлик чораларини кўришларини сўраймиз», — дейилади хабарда.