Бугун, 3 ноябр куни Туркий давлатлар ташкилотининг 10-саммитида Қозоғистон президенти Фаластин халқига 1 миллион долларлик гуманитар ёрдам жўнатишини маълум қилди.

«Атрофимизда ҳозир қийин вазият бор. Шимолда Россия ва Украина ўртасида, Яқин Шарқда – Исроил ва Фаластин ўртасида можаро давом этмоқда. Афғонистонда беқарорлик давом этмоқда. Ғарбда ноқонуний миграция муаммоси тобора кучайиб бормоқда. Бугун Ғазо секторидаги тинч аҳоли, айниқса, болалар ва қариялар қарама-қаршилик қурбонига айланмоқда. Асосий вазифа – уларнинг хавфсизлигини таъминлаш. Шу муносабат билан мен Фаластин халқига 1 миллион доллар миқдорида гуманитар ёрдам кўрсатишга қарор қилдим», — деди Тўқаев.

Президент ўнлаб йиллар давомида ҳал этилмаган долзарб муаммоларни зўравонлик ва террористик ҳаракатлар орқали ҳал этиш «мутлақо номақбул» эканини таъкидлаган. Давлат раҳбарининг фикрича, вазиятнинг кескинлашуви жиддий оқибатларга олиб келиши мумкин.

«Шу муносабат билан биз ҳар қандай низоларни фақат тинч музокаралар ва дипломатик мулоқот орқали ҳал қилишга чақирамиз. Биз учун барча давлатларнинг ҳудудий яхлитлигини сақлаш, уларнинг ички ишларига аралашмаслик асосий устувор вазифалардир. Бирлашган Миллатлар Ташкилоти Хавфсизлик Кенгаши резолюцияларини қатъий бажариш ва халқаро ҳуқуқ нормаларига риоя қилиш муҳим», — деди Тўқаев.