Қозоғистон Миллий хавфсизлик қўмитасининг собиқ раҳбари Карим Масимовга нисбатан иккита янги жиноий иш қўзғатилди. Tengrinews сайтининг билдиришича, Масимов прокуратура рухсати билан тергов ҳаракатлари олиб борилиши учун МХХ пойтахт бошқармасининг тергов изоляторига олиб келинган.

Масимовга нисбатан Қозоғистон Республикаси Жиноят кодексининг 208-моддаси (Жиноий йўл билан олинган жиноий даромадларни легаллаштириш) ва 366-моддаси (Ўта йирик миқдорда пора олиш) билан терговга қадар ҳаракатлар давом эттирилмоқда.

Карим Масимов 2022 йилнинг 8 январида бутун Қозоғистонни қамраб олган тартибсизликлардан сўнг ҳибсга олинган эди. Масимов мамлакатдаги энг нуфузли шахслардан бири ва собиқ президент Нурсултон Назарбоевга яқин ҳисобланган. Ўтган йиллар давомида Қозоғистон Республикаси Бош вазири, маъмурият раҳбари ва Қозоғистон президенти ёрдамчиси лавозимларида ишлаган.

Эслатиб ўтамиз, аввалроқ Ўзбекистон ва Қозоғистон ўртасида «Бейнеу-Шалкар» автомобил йўли қурилиши ҳақда хабар берилганди.