Қатарда бўлиб ўтаётган Осиё кубоги доирасидаги чоракфинал ўйинида Ўзбекистон терма жамоаси Қатарга қарши пенальтилар сериясида мағлуб бўлганди. Шу ўйинда «SportTV» шарҳловчиси пенальтидан фойдалана олмаган миллий жамоа аъзоси Зафармурод Абдираҳматовга танбеҳ берганди.

«Bugun.uz» мухбири «SportTV» шарҳловчиси Отабек Жўраев билан боғланиб, вазиятга ойдинлик киритди. Таъкидлашича, вазиятга 8 йилдан буён шарҳловчилик қилаётган бўлса, фаолияти давомида ишлаган мингдан ортиқ ўйинлари ичида бунақаси бўлмаган. У бундай ҳолатга биринчи марта тушаётганини таъкидлайди.

Отабек Жўраев бунинг сабабини айтар экан, терма жамоа деярли ярим финалга чиққани, барча прогнозларга кўра, Ўзбекистон Қатардан устун келиши айтилаётган, қолаверса, пенальтилар сериясида ҳам 2:1 ҳисобида олдинда бораётган бир пайтда Зафармурод Абдираҳматов жойидан бир қадам ҳам ортга чекинмаган ҳолда пенальтини амалга оширгани ва гол уролмагани шарҳловчини қаттиқ стрессга туширган. 

«Мен ҳеч бир жамоага мухлислик қилмайман. Ўйинларни бетараф, совуққонлик билан шарҳлайман. Лекин ҳар бир ўйинни шарҳлаганда менда ҳиссиёт бўлади. Акс ҳолда, хавфли вазиятлар ва голларда мухлисларга эмоцияларни етказиб бўлмайди. Бироқ, Ўзбекистон ўйнаган куни менда ҳеч қандай ҳиссиёт бўлмади. Аксинча, мен ҳам худди майдонда пенальти тепаётган футболчилар каби босим остида эдим. Зафармурод гол уролмаганида мен ўзимни бошқариб туролмадим ва оғзимдан ўша сўз чиқиб кетди. Ўша куни мен шарҳловчи эмас, мухлис эдим», дейди у.

Шарҳловчига кўра, ўша вазиятда унинг ҳам барча мухлислар каби жаҳли чиққан. Шарҳдан чиққач, бутун телеканал ходимларининг кайфияти жуда ёмон бўлган. Ҳатто, ўйиндан сўнг бошқа шарҳловчилар каби ўйин ҳақидаги фикрлари билан ўртоқлашиб, интервью беришни истамаган. Гарчи бу телеканал учун одат тусига кирган бўлса ҳам. 

Шунга қарамай, у ўзини босиб олгач, Telegram каналида мухлислар ва футболчидан узр сўраган. Шунингдек, кейинроқ Зафармурод Абдираҳматовдан ҳам шахсан кечирим сўраган. Футболчи ҳам ундан ўпкаламаганини, ҳаммаси жойида эканини билдирган. 

Отабек Жўраевни ижтимоий тармоқларда аксар мухлислар қўллаб-қувватлаган. Телеканал раҳбарияти ҳам унга нисбатан ҳозирча ҳеч қандай салбий реакция билдирмаган.