Автобус ҳайдовчиси томонидан содир этилган жиноятга ҳукм ўқилди. Жиноят ишлари бўйича Урганч шаҳар судида 1975 йилга туғилган, оилали, 2 нафар фарзанди бор, МЧЖ да ҳайдовчи бўлиб ишлаган фуқарога нисбатан жиноят иши кўриб чиқилди.

Судда маълум бўлишича айбланувчи ISUZU русумли автобусни Паҳлавон Маҳмуд кўчаси йўналишида бошқариб келаётганида, йўлнинг белгиланмаган қисмидан ўтаётган пиёдани уриб юборган. Воқеа натижасида пиёда вафот этган.

Айбланувчи суд залида айбига иқрор бўлган ҳамда марҳумнинг яқинларидан кечирим сўраган. Судга оид автотехник экспертизага кўра, автобуснинг тезлиги 46,9 км/соатни ташкил қилиши ва тормоз бериш орқали ҳодисани олдини олиш имкони бўлганлиги аниқланган.

Судда томонларнинг кўрсатмасини инобатга олиб, бошқа далилларнинг хулосасига таяниб, судланувчининг оилавий аҳволини инобат олиб ҳукм ўқилди.

Айбланувчи Жиноят кодексининг 266-моддаси 2-қисмида назарда тутилган жиноятни содир этганликда айбланиб, 4 йил озодликдан маҳрум этиш ва 2 йил автомобил бошқарувидан чеклаш жазоси тайинланди. Жазони манзил колонияларида ўташ белгиланди.