Қашқадарё вилоятида катта миқдорда газ конденсати ёқилғисини талон-торож қилганлар ушланди. Бу ҳақда Бош прокуратура хабар берди.

Маълум қилинишича, шу йилнинг 25 январ куни ўтказилган тезкор тадбирда беш нафар фуқаро ўзаро жиноий гуруҳ ташкил қилиб, вилоятнинг Нишон тумани «Ширинобод» маҳалласи ҳудудидан кесиб ўтувчи «Epsilon Development company» МЧЖ шаклидаги хорижий корхонага тегишли газ конденсати қувурини тешиб, жўмрак ўрнатиш орқали қиймати 17,4 миллион сўмлик 8,9 тонна конденсат ёқилғисини ўғирлаб чиққан вақтда далилий ашёлар билан ушланган.

Олиб борилган текширув ҳаракатлари давомида ушбу жиноий гуруҳ томонидан жами 1,1 миллиард сўмлик 568,5 тонна газ конденсати ёқилғиси талон-торож қилинганлиги аниқланган.

Ҳолат юзасидан Қарши ихтисослаштирилган прокуратураси томонидан Жиноят кодексининг 169-моддаси 4-қисми «а» банди билан жиноят иши қўзғатилиб, беш нафар шахс процессуал тартибда қўлга олинган. Ҳозирда дастлабки тергов ҳаракатлари олиб борилмоқда.