Қирғизистонда барча турдаги ҳайвонлардан ҳайвонот боғлари ва цирк томошаларида фойданишни тақиқлаш таклиф этилди. Бу ҳақда «Sputnik Қирғизистон» хабар берди.

Маълум қилинишича, ушбу қонун лойиҳаси депутат Дастан Бекешев томонидан жамоатчилик муҳокамасига тақдим этилган. Қонундан мақсад ҳайвонларга нисбатан ғайриинсоний муносабатларга чек қўйиш, бу бўйича умумий ва махсус талабларни белгилаш экани қайд этилган.

Депутатнинг фикрича, ёввойи ҳайвонлар ўз табиатига кўра бўйсунишга мос эмас, шунинг учун ҳам улар саҳнада амалга оширадиган ҳар қандай чиқишларга шафқатсиз усуллар ёрдамида эришилади – машғулотлар илгак, қамчи, таёқ, шовқинли қурол, психотроп моддалардан фойдаланишни назарда тутади.

Дунёнинг 45 дан ортиқ мамлакатлари кўнгилочар соҳада ҳайвонлардан фойдаланишни тўлиқ ёки қисман тақиқлайди.

Эслатиб ўтамиз аввалроқ Исроилда ҳайвонларга нисбатан қўпол муомалада бўлганлар беш йилга қамалиши, Ўзбекистонда ҳайвонларга нисбатан шафқатсиз муносабатда бўлганлик учун жиноий жавобгарлик белгилангани ҳақида хабар берилганди. Шунингдек, Тошкентда ов милтиғи билан ҳайвонларга ўқ узган эркакка қандай чора кўрилгани маълум қилинганди.