Қўқон педагогика институтининг қизлар ётоқхонасига камера ўрнатилгани аниқлангани ҳақида хабар берилганди. Олий таълим, фан ва инновациялар вазирлиги мазкур ҳолат юзасидан қўшимча маълумот берди.

Маълум қилинишича, Қўқон давлат педагогика институти талаба қизлари шикоятига кўра ҳолат вазирлик томонидан назоратга олинган.

«Вазирлик инсон шахсий ҳаётига ўзбошимчалик билан аралашиш, шахсий маълумотларни очиқлашга уриниш каби хатти-ҳаракатларни қаттиқ қоралайди, ушбу ҳолатни талаба-қизларнинг шаъни ва қадр-қимматини камситиш деб баҳолайди. Ҳеч ким инсон эрки ва шахсий ҳаётига дахл қилишга ҳақи йўқ», дейилади хабарда.

Шунингдек, воқеа иштирокчиси бўлган қизларнинг тазйиқсиз таълим олишлари кафолатланиши қўшимча қилинди.

Ўз навбатида, ҳуқуқ-тартибот органлари томонидан текширув ишлари давом эттирилаётганини маълум қилинди.

Саида Мирзиёева олий таълим, фан ва инновациялар вазири Иброҳим Абдураҳмонов билан учрашиб, таълим соҳасидаги масалаларни муҳокама қилганини маълум қилди.

«Қўқон педагогика институтида содир бўлган воқеа ҳамда талаба қизларнинг ҳуқуқларини ҳимоя қилиш, уларга нисбатан зўравонликларнинг олдини олиш чораларини муҳокама қилдик.

Таълим тизими ҳар қандай зўравонликка қарши курашни бошлашимиз керак бўлган асосий платформалардан биридир», — деб ёзади Мирзиёева.