Ўзбекистоннинг Қозоғистондаги элчихонаси матбуот хизмати Қозоғистонда ўзбекистонлик фуқаролар билан содир бўлган ёнғин юзасидан маълумот берди.

Хабар берилишича, 8 июнь куни соат 11:45 да Атирау вилояти, Макат тумани ҳудудидан ўтувчи «Атирау-Актобе» республика аҳамиятига эга автомобиль йўлининг 31-километрида Россия-Ўзбекистон йўналишида ҳаракатланиб кетаётган Ўзбекистон давлат рақамига эга бўлган Lada Largus русумли автомашинада ёнғин содир бўлган. Соат 12:50 да ёнғин тўлиқ бартараф этилган.

Автомобиль ичида 3 нафар Ўзбекистон фуқаролари бўлган. Ёнғин оқибатида Lada Largus машинаси ҳайдовчиси жарохат олмаган, қолган 2 та йўловчи ҳар хил даражадаги куйиш жароҳати билан Атирау вилоят касалхонасига ётқизилган. Ҳайдовчи, жароҳат олганларнинг шахсларига аниқлик киритилган ва улар билан доимий алоқа ўрнатилган.

Ушбу ҳолат Бош консулхона назоратига олинган.