Россия келаси ҳафта бензин ва дизел экспортига қўйилган барча чекловларни олиб ташлаши мумкин. Reuters’нинг маълум қилишича, ҳукумат ишлаб чиқарувчиларга чекловларни бекор қилишга тайёргарлик кўришни буюрган.

Маълумки, Россия ички бозоридаги нархларни мувозанатлаштириш ва тақчилликни бартараф қилиш мақсадида 2023 йилнинг 21 сентябр куни ёнилғи экспортига чеклов жорий қилган эди. 6 октябр куни эса чекловлар бироз юмшатилиб, қувур орқали дизел экспорт қилишга рухсат берилган. Аммо бензин бўйича чеклов чоралари сақлаб қолинган. Шунингдек, юк машиналари ва темир йўллар орқали чет элга бензин етказиб бериш ҳам чекланган.

Россия энергетика вазири Николай Шулгинов ҳам 8 ноябр куни бензиннинг айрим турлари учун экспорт тақиқини бекор қилиш масаласи кўриб чиқилаётганини айтган.

Reuters’нинг исми ошкор қилинмаган бир нечта манбаси ҳам Россияда келаси ҳафтадан экспорт тақиқи бекор қилиниши мумкинлигини тасдиқлаган. Айни пайтда ишлаб чиқарувчилар экспорт жадвали ва ишларни қайта бошлаш режаси устида ишлаётгани айтилган.

Маълумот учун, дизел Россия экспорт қиладиган энг йирик нефт маҳсулоти бўлиб, 2022 йилда унинг ҳажми 35 миллион тоннани ташкил қилган. Бензин экспорти эса 2022 йилда 4,8 миллион тоннага етган.

Ёнилғи экспорт чекловининг бекор қилиниши мамлакат ички бозорида ортиқча маҳсулотнинг йиғилиб қолгани билан ҳам боғлиқ бўлиши мумкин.

Аноним компания раҳбарларидан бири Reuters’га ҳозирги мавсумда Россияда сотув даражаси паст бўлгани сабабли, бунчалик кўп ёнилғи сотишнинг иложи йўқлигини айтган.