Кременчугская кўчасидаги полиция биносида 19 май куни эрталаб йўл ҳаракати полицияси катта инспекторининг жасади топилган. Бу ҳақда База хабар берди.

Аниқланишича, жасад полиция ходимининг хонасидан топилган. Марҳумнинг ёнида хизмат тўппончаси ва ўз жонига қасд қилиш тўғрисидаги ёзув бўлган. Унда эркак ўз ҳаракатини тушунтириб берган.

«Барчаси учун кечирим сўрайман, лекин мен энди бундай яшай олмайман. Турли ўйин аппаратлари ҳаётимни ютиб юборди. Мен бор пулимни уларга сарфладим, лекин ҳеч қачон ютолмадим. Мен ишлаган бутун жамоадан узр сўрайман. Бу ерда ҳақиқатан ҳам ишончли ва содиқ одамлар ишлайди, лекин мен энди бундай яшай олмайман!

2024 йил мен учун мутлақо қора йил бўлди. Бу йил мен жуда кўп нарсани йўқотдим. Илтимос, Мостбет онлайн казино ва унинг барча ‘ойна’ларини ёпинг. 2020 йилдан ҳозирги кунгача бу мени ўлдирди, мен ҳамма нарсани йўқотдим», — деб ёзилган хатда.

Хатда инспектор маошларнинг камлигидан ҳам шикоят қилиб, полиция раҳбариятини буни ўзгартиришга чақирган.

«Умид қиламанки, Ички ишлар вазирлигида бирор ўзгариш рўй беради ва улар ишингиз учун сизга муносиб ҳақ тўлайдилар», — деб ёзган полиция ходими.

Бир ҳафта олдин Москвада яна бир полициячи ҳам иш жойида ўз жонига қасд қилгани ҳақида хабар берилганди. Дастлабки маълумотларга кўра, 38 ёшли прапоршик квартирасини сотиб, пулини онлайн қиморга тиккан. Барча пулни ютқазгандан кейин, ўз жонига қасд қилган.

Ҳозирда ҳолат бўйича Москва полицияси томонидан тергов ҳаракатлари олиб бормоқда.

Маълумот учун, Ўзбекистонда 2025 йил 1 январдан интернет тармоғида таваккалчиликка асосланган ўйинларни фаолиятини ташкил этиш ва букмекерлик фаолиятини амалга оширишга рухсат этилади. Лицензиялар асосида ташкиллаштирилган лотерея, интернет тармоғидаги ўйинлар ва букмекерлик гаровларида фақат 18 ёшга тўлган Ўзбекистон резиденти ва норезидентлари қатнашиши мумкин.