Санкт-Петербургда Ички ишлар вазирлиги идорасининг патент бериш бўлимини портлатиб юбориш билан таҳдид қилган Ўзбекистон фуқароси қўлга олинди. Бу ҳақда «Комсомолская правда» хабар берди.

Маълум қилинишича, 3 июнь куни навбатчилик бўлимига бир киши Моисеенко кўчасидаги давлат идорасини портлатмоқчи бўлганлиги ҳақида хабар берилган. Етиб келгач, ҳуқуқ-тартибот идоралари ходимлари бино ва унинг атрофини кўздан кечиришган ва ҳеч қандай хавфли нарса топилмаган.

Кейинчалик маълум бўлишича, ёлғон қўнғироқ 2 май куни Россияга ишга жойлашиш мақсадида келган 35 ёшли ишсиз Ўзбекистон фуқароси томонидан қилинган.

Ҳозирда ҳуқуқ-тартибот идоралари ходимлари эркакни қўлга олишган. Унга нисбатан террорчилик акти ҳақида ёлғон хабар бериш моддаси бўйича жиноят иши қўзғатилган.