Россияда ишлаётган ўзбекистонлик аёл квартирасида ўлдириб кетилган. Фаррош бўлиб ишлаётган аёлнинг жасади топилганда ўлганига 10 кун бўлган. Bugun.uz’даги маълумотларга кўра, Москвадаги ушбу квартирага борганлардан бири уйда нохуш ҳидни сезиб, кимдир ўлиб ётганидан шубҳаланган ва полиция ходимига хабар берган.

Шу йилнинг 23 октябр куни соат 14:40 да уйга етиб келган полиция ходими каравот остидаги яширин жойдан аёл жасадини топган. Мурдада ташқи зўравонлик белгилари бўлмаган. Лекин, аёлнинг танаси чириб, анча ўзгарган.

28 ёшли Сабоҳат Қ нинг Россияда ҳеч қандай пропискаси бўлмаган. Уйни 23 ёшли ўзбекистонлик Элёрбек исмли йигит билан ижарага олган. Йигит эса 12 октябр куни соат 10:05 да Истанбулга учиб кетган.

Bugun.uz олган маълумотларга кўра, уйнинг эгаси чет элда яшаб, квартирани онлайн тарзда кунлик ижарага берадиган бўлган. Марҳумни сўнгги марта шу йилнинг 11 октябр куни хонадонни тозалаётганда кўришган.

Элёрбекнинг аёл ўлимдан сўнг хорижга учиб кетиши шубҳа уйғотган ва у қидирувга берилган. Ўлим сабабини аниқлаш учун жасад ўликхонага юборилган.