Россиянинг НТВ телеканалида бўлиб ўтган ток-шоуда тарихчи Михаил Смолин 1917 йилга қадар ўзбек ва қозоқлар миллат сифатида мавжуд бўлмаганини айтди.

«Қозоғистон қандай пайдо бўлди? Аслида, дастлаб РСФСР таркибида Казаклар ССР бўлиб, унда қозоқлар умуман йўқ эди. Кейин Казаклар ССР таркибида Қирғизистон ССР тузилди, кейин эса РСФСР таркибидан ажралиб чиқди. У ерда халқларнинг шаклланишига оид қарорлар ихтиёрий равишда қабул қилинган. Масалан, ўзбеклар инқилобгача бўлмаган, бундай этник ном ҳам йўқ эди. Улар бир неча Марказий Осиё халқларидан ўзбекларни яратишди»,- деган Смолин «Место встречи» ток-шоусида.

Ижтимоий тармоқларда кўплаб ўзбекистонлик фуқаролар тор фикрли шахсларнинг бундай баёнотлари Ўзбекистон ва Россия ўртасидаги икки томонлама муносабатларга ниҳоятда салбий таъсир кўрсатаётганини қайд этишган.

Жумладан, Расул Кушербаев ўзининг ижтимоий тармоқлардаги саҳифасида шундай ёзади:

«Буниси энди ошиб тушди. Рус шовинист, пропогандачиларидан бири тарихчи Михаил Смолин деган шахс 1917 йилга қадар ўзбек ва қозоқлар миллат сифатида мавжуд бўлмаганини таъкидламоқда. Видео Россиянинг НТВ каналида берилган. Кўриниб турибдики, катта эҳтимол билан Кремл буюртмаси асосида рус зиёлилари секин аста Марказий Осиё мамлакатларини босиб олишга ўз жамиятини руҳан тайёрламоқда. Бу ссенария Украинага уюштирилиши кутилган босқиндан олдин ҳам қўлланилган. Бундай ҳаракатлар фонида биз ҳеч бўлмаса биринчи галда ўз жамиятимизни хуружлардан сақлаш учун рус пропагандаси билан шуғулланаётган барча каналларни чеклаш ҳақида тўхтамга келишимиз керак. Ўзбекистон ҳудуди бўйлаб Россиянинг барча рус пропоганда каналлари ёпилиши лозим вассалом!Бу суверенитет масаласи».