Самарқанд вилояти ИИБ матбуот котиби берган хабарга кўра, вилоятнинг Самарқанд шаҳрида профилактика инспекторини калтаклаганларга нисбатан жиноят иши қўзғатилиб, улар қамоққа олинган.

Айтилишича, шу йилнинг 20 ноябр куни соат 19:30 да Самарқанд шаҳар «Бунёд» маҳалласида яшовчи фуқаро «102» операторига қўнғироқ қилиб, яшаш хонадонида жанжал бўлаётганлигини маълум қилган ҳамда профилактика инспекторини юборишни сўраган.

Шаҳарнинг ИИО ФМБ 6-сон ИИБ профилактика инспектори лейтенант А.Тошпўлотов чақирувга асосан фуқаронинг хонадонига борганида, муқаддам судланган М.Р. ва унинг опаси, турмуш ўртоғи ҳамда укасининг жанжаллашаётганини кўрган инспектор уларни ажратишга уринган. Бироқ, фуқаролар профилактика инспекторига фаол қаршилик кўрсатиб, уни турли жойларига уриб тан жароҳати етказишган. Ички ишлар ходимига тегишли Spark автомобилининг олд ойнаси эса синдирилиб, моддий зарар етказилган.

Ҳолат юзасидан Жиноят кодексининг 219-моддаси 2-қисми билан жиноят иши қўзғатилиб, гумонланувчилар процессуал тартибда қамоққа олинган.