Тошкент шаҳри Сергели туманидаги омборхонада 2023 йилнинг 28 сентябр куни портлаш содир бўлганди. Портлаш оқибатида 17 ёшли мактаб ўқувчиси ҳалок бўлган. Bugun.uz қўлга киритган сўнгги маълумотларга кўра, портлаш оқибатида нафақат аҳоли хонадонлари ва биноларга, балки Тошкент метрополитенининг ер усти йўналиши «Турон» (13-бекат) бекатига ҳам қисман зарар етган.

Портлаш оқибатида метро бекатининг «облицовка»лари тушиб кетган, станциядаги хизмат хоналари шифтига енгил («штукатурка»лари тўкилган) зарар етган, Ariston сув иситгичлари тушиб кетган. Бекатда таъмирлаш ишлари ўтказилиб, оқибатлар бартараф этилган.

Қайд этиш керак, Тошкент метрополитени «Ер усти ҳалқа йўли»нинг Қурувчилар даҳасидан Сергели мавзесигача бўлган «Турон» (13-бекат) ва «Қипчоқ» (14-бекат) бекатларининг ёпилиши ҳақиқатан ҳам қурилиш ишларининг якуний босқичи билан боғлиқ бўлиб, бекатлар ёпилишининг портлаш оқибатида юз берган ишлар билан ҳеч қандай боғлиқлиги йўқ.

Bugun.uz манбаси ҳозирда 11 ва 12-бекатларнинг ўртасида жойлашган темир йўл «стрелка»си лойиҳа бўйича 13-станцияда жойлашган бўлиши ва айнан шу ишларни амалга ошириш учун бекатлар вақтинча ёпилишини маълум қилди.