Президент Шавкат Мирзиёев кеча, 19 сентябр куни Ню-Йоркда ўтаётган БМТ Бош Ассамблеяси 78-сессиясининг умумий мунозаралари доирасида ташкилот бош котиби Антониу Гутерриш билан учрашув ўтказди. Бу ҳақда Президент матбуот котиби Шерзод Асадов хабар берди.

Қайд этилишича, учрашувда  Ўзбекистоннинг БМТ билан ҳамкорлигини янада кенгайтириш истиқболлари, барқарор ривожланиш соҳасидаги миллий вазифа ва мақсадларни рўёбга чиқариш масалалари кўриб чиқилган. Шунингдек, биргаликда қарийб 140 та дастур ва лойиҳа муваффақиятли амалга оширилаётгани, Ўзбекистон ташаббуси билан БМТ Бош Ассамблеясининг 6 та резолюцияси қабул қилингани айтиб ўтилган.

Бундан ташқари, учрашувда  Оролбўйи минтақаси аҳолисини ижтимоий қўллаб-қувватлаш учун махсус Траст фонди фаолият юритилаётгани таъкидланган.

Бош котиб янги «Ўзбекистон – 2030» стратегиясига киритилган мақсад ва вазифаларнинг кўламдорлигини, улар Барқарор ривожланиш мақсадлари билан тўлиқ ҳамоҳанглигини алоҳида қайд этган ҳамда БМТ ва унинг барча институтлари ушбу дастурий ҳужжатни амалга оширишга кўмаклашишга тайёрлигини билдирган.

Музокаралар якунида эса Ўзбекистон билан БМТ ўртасидаги кенг кўламли шерикликни чуқурлаштиришнинг устувор йўналишлари бўйича «йўл харитаси»ни ишлаб чиқишга келишиб олинган.

Эслатиб ўтамиз, аввалроқ Шавкат Мирзиёев Жо Байден билан учрашгани ҳақида хабар берилганди.