Президент Шавкат Мирзиёев Тожикистон пойтахти Душанбе шаҳрида бўлиб ўтаётган Марказий Осиё давлат раҳбарларининг бешинчи Маслаҳатлашув учрашувида халқаро медиа-платформа ишлаб чиқиш таклифини берди. Бу ҳақида «Sputnik Ўзбекистон» хабар берди.

«’Марказий Осиёнинг тарихи ва маданияти. Ягона ўтмиш ва умумий келажак’, деб номланади. Унда бутун минтақа учун контент яратилади. Бунга олимлар ва кенг жамоатчилик вакиллари таклиф қилинади. Бу ўзаро тушуниш ва минтақавий ўзига хосликни мустаҳкамлашга хизмат қилади», – дея яратилувчи платформа ҳақида умумий маълумот бериб ўтган Президент.

Душанбеда бўлиб турган Ўзбекистон раҳбари Марказий Осиё мамлакатларининг ўзаро муносабатлари, савдо ва иқтисодиёт, транспорт, яшил иқтисодиёт, энергетика, сув ва экология соҳаларидаги ҳамкорлик масалаларида нутқ сўзлаган. Шунингдек, Ўзбекистон раҳбари иқлим ўзгаришларининг салбий оқибатларига қарши курашиш юзасидан ўз позициясини баён этган.

Эслатиб ўтамиз, аввалроқ Шавкат Мирзиёев Тожикистонга ташрифи давомида мамлакат президенти Эмомали Раҳмон билан учрашганди.