Франция президенти Эммануэл Макрон расмий ташриф билан Ўзбекистонга келаётгани, Президент Шавкат Мирзиёев эса у билан учрашиш учун Самарқандга кетгани ҳақида хабар берилганди. Кеча, 1 ноябр куни икки давлат раҳбари Самарқандда учрашиб, тунги шаҳарни сайр қилди.

Президент матбуот хизматининг хабар беришича, Макрон ва Мирзиёев UNESCO’нинг Жаҳон мероси рўйхатига киритилган Регистон мажмуасига ташриф буюрган.

Сайр давомида Франция президентига Регистон майдонининг тарихи, ноёб нақшлари, у билан боғлиқ шахслар ва қизиқарли воқеалар ҳақида сўзлаб берилган. Мажмуанинг улуғворлиги ва гўзаллиги меҳмонларда завқ уйғотгани таъкидланган. Бу ерда Шавкат Мирзиёев ва Эммануэл Макрон биргаликда суратга тушган.

Шундан сўнг, президентлар «Буюк ипак йўли» халқаро туризм марказидаги «Боқий шаҳар» тарихий-этнографик мажмуасида бўлган. Улар ўртасида самимий мулоқот бўлиб ўтгани, Самарқанд жаҳон цивилизациясининг қадимий бешикларидан бири бўлгани, бугун ҳам халқаро саммит ва туризм марказига айланиб бораётгани қайд этилган. Меҳмонларга, шунингдек, ўзбек халқининг бадиий, ҳунармандлик ва мусиқий маданияти намойиш этилган.

Маълумот учун, ташрифнинг асосий тадбирлари, шу жумладан, олий даражадаги музокаралар бугун, 2 ноябр куни бўлиб ўтади.