Шавкат Мирзиёев 20 июл куни Тошкент шаҳридаги бунёдкорлик ишлари билан танишди.

Президент Tashkent city мажмуасида барпо этилган улкан иншоотлар, ҳусусан унинг «Пахтакор» метро бекати тарафида қурилаётган йирик савдо маркази ҳудудида бўлиб, пиёдалар ва автомобиллар учун шароитларни кўздан кечирди. Президент келгусида ҳаракат янада кўпайишини инобатга олиб, Ботир Зокиров ва Навоий кўчалари кесишмасида йўл ўтказгич қуриш, пиёдалар йўлакларини қулайлаштириш зарурлигини таъкидлади.

Шавкат Мирзиёев Тошкентнинг Навоий, Ойбек, Нукус кўчалари бўйлаб юриб, йўллардаги шароитни кўздан кечирди, одамлар билан суҳбатлашди.

Президент автомобиллар қатновига қулайликни ошириш мақсадида у кенгайтирилиб, қўшимча эстакада қурилаётган Тошкент халқаро аэропорти ёнидаги кўприкни қурилиш жараёнини кўрди. Қурилиш битгандан сўнг, унинг узунлиги 650, эни 30 метр бўлади. Айланма шаклидаги чиқиш-тушиш йўллари қайрилиб олиш хавфини йўқотиб, ҳаракатни осонлаштиради. Президент, атрофни кўкаламзорлаштириш, манзарали дарахтлар экиш кераклигини таъкидлади.

Шунингдек, Президент Яшнобод туманида Абдулла Қодирий ва Кичик ҳалқа йўли орасидаги Элбек боғини асраш, аҳолининг дам олиши учун шароитларни кенгайтириш бўйича кўрсатмалар берди.

Бундан ташқари, Шавкат Мирзиёев «Тошкент-Шарқий» аэропорти қурилишини ҳам бориб кўрди. Аэропортнинг умумий майдони 693 гектар, унда 4 километр узунликдаги учиш-қўниш йўлаги, замонавий терминаллар, самолётлар учун ангар ва перронлар бўлади. Аэропорт ноқулай об-ҳаво шароитларида ҳам учиш-қўнишни таъминловчи ICAO III-А тоифасидаги замонавий радиотехника ва метеорология асбоб-ускуналари билан жиҳозланади. Шавкат Мирзиёев барпо этилган учиш-қўниш йўлаги ва юқори мартабали меҳмонлар терминали биносини кўздан кечирди. Галдаги қурилиш ишларини молиялаштириш, терминалнинг ташқи кўриниши ва делегациялар учун қулайликларни қайта кўриб чиқиш бўйича топшириқлар берди.