Президент Шавкат Мирзиёев Иқтисодий ҳамкорлик ташкилотининг 16-саммитида иштирок этиш учун Ўзбекистонга келган Туркия раҳбари Ражаб Тоййиб Эрдўғон билан учрашди.

Президент матбуот хизматининг хабар беришича, икки давлат раҳбари Ўзбекистон билан Туркия ўртасидаги кўп қиррали ҳамкорликни янада кенгайтириш ва кенг қамровли стратегик шериклик муносабатларини ривожлантириш масалаларини кўриб чиққан.

Учрашувда мамлакатлар ўртасидаги мулоқот ва алмашинув фаол давом эттирилаётгани, товар айирбошлаш ҳажми, тўғридан-тўғри авиақатновлар сони, сайёҳлар оқими ортиб бораётгани эътироф этилган. Хусусан, Ўзбекистонда 2023 йилнинг бошидан буён Туркиянинг етакчи компаниялари иштирокида 500 миллион доллардан ортиқ тўғридан-тўғри сармоя жалб қилиниб, 200 дан зиёд корхона ташкил этилган.

Учрашувда савдо, саноат, инновациялар, энергетика, транспорт, таълим, маданият, туризм ва бошқа соҳалардаги қўшма лойиҳа ва дастурларни жадаллаштириш муҳимлиги таъкидланган.

Бўлажак тадбирлар режаси, шу жумладан Ўзбекистон-Туркия Стратегик ҳамкорлик кенгашининг навбатдаги йиғилишига тайёргарлик кўриб чиқилган.

Шунингдек, давлат раҳбарлари минтақавий масалалар юзасидан ҳам фикр алмашган.