Шавкат Мирзиёев воҳа аҳолисининг қарийб ярмида ортиқча вазн муаммоси борлигидан ташвиш билдирди
Шунингдек, давлат раҳбари Қашқадарё вилояти Китоб туманида замонавий кардиология маркази қуришга топшириқ берган.
Президент Шавкат Мирзиёев воҳа аҳолисининг қарийб ярмида ортиқча вазн муаммоси борлигидан хавотир билдирди.
Давлат раҳбарининг матбуот котиби Шерзод Асадовга кўра, Президент Қашқадарё вилояти Қарши шаҳрида ўтказган йиғилишида воҳа аҳолисининг 42 фоизида ортиқча вазн муаммоси сабаб юрак қон-томир касалликлари кўпайганидан хавотир билдирган ҳамда соғлом турмуш тарзи тарғиботини кучайтириш ва вилоятда соғлиқни сақлаш тизими салоҳиятини ошириш зарурлигини таъкидлаган.
Жумладан, қўшимча равишда россиялик ҳамкорлар билан Китобда замонавий кардиология марказини қуриш бўйича топшириқ берилган.
Бундан ташқари, вилоятда мобил поликлиникалар хизмати йўлга қўйилиши, вилоят кўп тармоқли тиббиёт маркази негизида 600 ўринли замонавий клиника ташкил қилиниши айтилган.
