Маълум қилинишича, катталар учун виза нархи ҳозирги 80 евродан 90 еврога, болалар учун эса 40 эвродан 45 еврогача оширилади. Бу жорий этилиши режалаштирилган виза тўлови оширилишини билдиради. Бундан ташқари, виза режимининг бузилиши ёки ноқонуний миграция сабабли Европадан қайтган фуқароларини реадмиссия (қайтариб олиш) қилиш бўйича Европа Иттифоқи билан ҳамкорлик қилмайдиган давлатлар учун тўловларни ошириш таклиф қилинмоқда.

Агар давлат реадмиссия бўйича етарлича ҳамкорлик қилмаса, унинг фуқаролари учун Шенген визаси нархи 120 евро (катталар учун) ва 160 евродан (болалар учун) мос равишда 135 эвро ва 180 еврогача кўтарилади.

Бундан ташқари, виза тўловларини қайта кўриб чиқиш ташқи хизмат кўрсатувчиларнинг хизмат тўлови сифатида олиши мумкин бўлган максимал суммага таъсир қилади. Шу тариқа, агар визанинг базавий қиймати 90 еврогача ошса, хизмат ҳақи ҳам 40 дан 45 еврога ошади.

Бироқ, Шенген визаси муддатини узайтириш нархи ўзгаришсиз қолади ва одатдагидай 30 еврони ташкил қилади. Виза тўловини қайта кўриб чиқиш виза режимини соддалаштириш бўйича келишувларга эга бўлган мамлакатларга таъсир қилмайди, бу келишувларда Виза кодексида кўрсатилган виза тўловлари аниқ кўрсатилган ҳоллар эса истиснодир.

Маълумот учун, Шенген визасини олганлар Европанинг 26 та давлати: Австрия, Бельгия, Чехия, Дания, Эстония, Финляндия, Франция, Германия, Греция, Венгрия, Исландия, Италия, Латвия, Литва, Люксембург, Мальта, Нидерландия, Норвегия, Польша, Португалия, Словакия, Словения, Испания, Швеция, Швейцария ва Лихтенштейнга сафар қилиши мумкин бўлади.