Самарқандда ўтказилаётган Шанхай ҳамкорлик ташкилоти саммитида Афғонистон вакили иштирок этмаслигининг сабаби айтилди. Бу ҳақда «K-News» нашри хабар берди.

Қайд этилишича, Толибон ҳаракати матбуот котиби ўринбосари Билол Каримий TOLOnews телеканалига берган интервьюсида афғон вакиллари ҳозирча Самарқанддаги Шанхай ҳамкорлик ташкилоти саммитига таклиф қилинмаганини айтган.

Унинг сўзларига кўра, ҳаракат шунга қарамай афғонларга фойда келтирадиган ҳар қандай чора-тадбирларни олқишлайди ва Шанхай ҳамкорлик ташкилоти билан яхши муносабатлари ижобий натижа беришига умид қилади.

Шунингдек, «Самарқанддаги саммитда Афғонистон вакили бўлмайди. Шанхай ҳамкорлик ташкилоти бу давлат билан вақтинча алоқада эмас», — деган Tашкилотнинг миллий координатори Рахматулла Нуримбетов брифинг чоғида.

Унинг тушунтиришича, Шанхай ҳамкорлик ташкилоти халқаро ташкилот сифатида 2021 йил августида ўз фаолиятини тўхтатган Афғонистоннинг собиқ ҳукумати билан расмий алоқаларни сақлаб келган.

Эслатиб ўтамиз, аввалроқ Арманистон бош вазири Никол Пашинян ШҲТ саммитида мавжуд вазият туфайли иштирок этмаслиги хабар қилинганди.