Россия СССРнинг барча собиқ республикалари билан уришишга мажбур бўлади. Бу ҳақда Россия Давлат Думаси депутати Евгений Фёдоров фикр билдирди.

Депутат собиқ совет республикаларини «баҳсли ҳудудлар», деб атаган ҳамда республикаларнинг ҳар бири СССРдан «ноқонуний равишда» ажралиб чиққанлигини иддао қилган. Шу сабабли, эртами-кечми Россия ва собиқ республикалар ўртасида низо ёки уруш келиб чиқиши айтилди.

«Барча собиқ республикалар эртами-кечми Россия билан конфликтга боради ёки урушади. Бу назария масаласи. Улардан баъзилари ҳозир бундай қилмайди: Беларус. Грузия аллақачон уруш қилган, Украина (урушяпти). Бу Арманистонга ҳам тўлиқ тааллуқли», — деди депутат.

Фёдоровнинг таъкидлашича, агар республикалар дипломатик йўл билан қайтарилса, ҳарбий можароларнинг олди олинади.

Эслатиб ўтамиз, 2021 йилда россиялик марҳум депутат Владимир Жириновский Марказий Осиё давлатлари Россия таркибига вилоят сифатида қўшилиши ҳақида баёнот берган ва бунга нисбатан Миллий тикланиш партияси депутати Алишер Қодиров муносабат билдирганди. Аввалроқ Арманистонда АҚШ билан қўшма ҳарбий машғулотлар ўтказилиши ортидан мамлакатнинг Москвадаги элчиси Россия Ташқи ишлар вазирлигига чақиртирилган ва унга норозилик нотаси топширилган.

Мавзуга доир: Арманистон ва Россия ўртасида совуқлик кучайиб бормоқда – The Insider