Тошкент туманлараро иқтисодий судининг 2023 йил 15 февралдаги ҳал қилув қарори билан «Туркистонбанк» хусусий акциядорлик тижорат банки банкрот деб топилди. Бу ҳақда Марказий банк матбуот хизмати хабар берди.

Регуляторнинг тегишли қарорига асосан мазкур банкнинг тугатиш комиссияси ўз фаолиятини тугатгани ҳамда суд томонидан А.Келдиев тугатиш бошқарувчиси этиб тайинлангани маълум қилинди.

Эслатиб ўтамиз, Марказий банк бошқарувининг 7 октябрдаги қарорига асосан «Туркистонбанк» хусусий акциядорлик тижорат банкидан банк фаолиятини амалга ошириш ҳуқуқини берувчи лицензия чақириб олинганди.

Фуқароларнинг банклардаги омонатларини кафолатлаш фонди Кузатув кенгашининг 2022 йил 18 ноябрдаги қарорига асосан «Туркистонбанк» омонатчиларининг маблағларини муддатидан аввал қайтирилиши белгиланган. 21 ноябрдан бошлаб «Туркистонбанк» омонатчилари бўлган жисмоний шахслар омонатга жойлаштирган маблағлари юзасидан агент-банк сифатида танланган «Қишлоқ қурилиш банк»ка мурожаат этишлари мумкинлиги қайд этилган.