2023 йил 18 октябр куни соат 08:47 да Сурхондарё вилояти Шўрчи-Хайробод ҳудудидаги қўриқланмаган кесишмада шаҳарлараро поезд фавқулодда тормоз беришига қарамай Spark русумли автомобил билан тўқнашиб кетган. Бу ҳақда «Ўзбекистон темир йўллари» АЖ матбуот хизмати хабар берди.

Аниқланишича, воқеа содир бўлган ҳудудда йўл белгилари ва сигнализацияси ўрнатилган.

Мазкур ҳолатга Spark ҳайдовчиси темир йўл кесишмалари орқали ҳаракатланиш қоидасини бузгани сабаб бўлгани айтилган.

Тўқнашув натижасида поезд бироз зарар кўрган, бироқ ундаги йўловчилар жабрланмаган.

Автомашина ҳайдовчиси шифохонага етказилган. Аммо кўрсатилган тиббий ёрдамга қарамасдан, вафот этган.

Ҳозирда воқеа юзасидан ҳуқуқ-тартибот идоралари томонидан текширув ишлари олиб борилмоқда.

Эслатиб ўтамиз, аввалроқ, Бухорода поезд ва юк машинаси ўртасида тўқнашув содир бўлгани хабар қилинганди.