Сурхондарёлик беморларда буйрак трансплантацияси ўтказилди
Буйрак кўчириб ўтказиш операцияси республиканинг олис ҳудудларида ҳам амалга оширилмоқда – ССВ.
Шу кунларда Соғлиқни сақлаш вазирлиги ташаббуси билан Сурхондарёда бўлаётган оммавий тиббий кўриклар доирасида вилоят кўп тармоқли тиббиёт марказида бир қанча оғир беморларда буйрак кўчириб ўтказиш операцияси бажарилган. Бу ҳақида Соғлиқни сақлаш вазирлиги матбуот хизмати хабар берди.
Сурункали буйрак етишмовчилигидан ўн йилдан буён азоб чекаётган 36 ёшли бемор аёлда трансплантация амалиёти ўтказилган.
Унга 31 ёшли синглиси бир буйрагини берган.
Соғлиқни сақлаш вазирлигининг маълумотига кўра, Тошкентдаги Хирургия маркази жарроҳлари Термиз шаҳрига келиб, ушбу операцияни амалга оширган.
Ангорлик 27 ёшли аёлга ҳам 52 ёшли отаси бир буйрагини берган.
Аёл 2022 йилдан буён гемодиализ муолажасини олиб келган. Айни вақтда ташхис терминал босқичга ўтгани сабабли ҳам унга буйрак кўчириб ўтказиш амалиёти тавсия этилган.
Вазирликка кўра, беморларнинг аҳволи яхши ва шифокорлар назорати остида саломатлиги тикланмоқда.
