«Толибон» Фараҳ вилоятида Эрон-Афғонистон чегарасидаги ўнлаб постлар тикланишини маълум қилди. Бу ҳақда «Bakhtar News» хабар берди.

Бу қарор «Толибон» комиссияси томонидан Ҳирот ва Фараҳ вилоятларидаги чегара ҳудудларида ўтказилган текширувдан сўнг қабул қилинган. Ўнлаб постларни таъмирлаш бўйича амалий ишлар бошланган, шундан кейин улар чегара қўшинларига топширилади.

Эслатиб ўтамиз, «Толибон» ҳаракати Афғонистоннинг Эрон билан чегарадаги назорат пунктларини кучайтирмоқда.

Ушбу ҳаракат кенг қамровли бўлиб, Афғонистоннинг қўшни давлатлар билан чегарадош барча нуқталарини қамраб олади. Эрон манбалари чегара назоратини кучайтириш хавфсизлик мақсадида қилинаётганини айтган.

Аввалроқ Афғонистон армияси ва полиция кучлари сони очиқланганди. Шунингдек, Эрон–Афғонистон чегарасида ҳарбийлар ўртасида тўқнашув содир бўлганди.