Кеча ижтимоий тармоқларда икки ўқувчи кўп қаватли уйнинг томига чиққани акс этган видео тарқалди. Тошкент шаҳри Чилонзор тумани ҳокимлиги ҳолат юзасидан муносабат билдирди.

Маълум бўлишича, томга чиққанлар Чилонзор туманидаги 128-умумтаълим мактабининг 9-синфи ўқувчилари С.М. ва М.И. лар бўлган.

Ҳолат юзасидан туман ҳокимлиги, мактаб маъмурияти, профилактика инспекторлари иштирокида тезкор ўрганиш ўтказилган ва улар тумандаги «2-Чарх Камолон» маҳалласида жойлашган кўп қаватли уйлардан бирининг том қисмига чиққани аниқланган.

Шунингдек, туман ҳокимлигининг Вояга етмаганлар ишлари бўйича комиссия раиси ўринбосари А. Ҳатамов бошчилигида мазкур ўқувчилар ва уларнинг ота-оналари, мактаб маъмурияти, психолог инспекторлар, туман ҳокимлигидаги Болаларни ҳимоя қилиш шўъбаси масъуллари иштирокида мулоқот ўтказилган. Учрашувда болалар қилган ишидан пушаймон эканини айтиб, кечирим сўраган.

Шунингдек, ота-оналари ҳам уларни бундан кейин қаттиқ назорат остига олишини билдирган.

Мактаб маъмурияти ва туман Болаларни ҳимоя қилиш шўъбаси мутасаддиларига С.М. ва М.И. га нисбатан қонун доирасида тегишли чора кўриш топширилган.