Шу йилнинг 8-9 ноябр кунлари Тошкент шаҳрида Президент Шавкат Мирзиёев раислигида Иқтисодий ҳамкорлик ташкилотининг 16-саммити бўлиб ўтиши сабабли Тошкент давлат иқтисодиёт университети ушбу вақт ичида масофавий тартибда иш юритади. Бу ҳақда ОТМ матбуот хизмати хабар берди.

Шунингдек, талабалар ва профессор-ўқитувчиларнинг университетга келишларида юзага келиши мумкин бўлган ноқулайликларнинг олдини олиш мақсадида дарс машғулотлари ўтказилмаслиги айтилган. ОТМнинг барча ходимлари ва профессор-ўқитувчилари ишни масофавий (онлайн) режимида олиб бориши белгиланган. Талабалар турар жойларида яшовчи талабалар эса ўз жойида қолиши таъкидланган.

Маълумот учун, икки кун давомида қолдирилган режадаги дарс машғулотлари 10-17 ноябр кунлари оралиғида профессор-ўқитувчиларнинг дарс жадвалига мослаштирилган ҳолда қайта ташкиллаштирилади.

Эслатиб ўтамиз, аввалроқ Ўзбекистонда Иқтисодий ҳамкорлик ташкилотининг навбатдаги саммити бўлиб ўтиши ҳақида хабар берилганди. Шунингдек, саммит сабабли Тошкент шаҳрида икки кун мобайнида айрим автобус йўналишлари ўзгариши айтилганди.