Тошкент метросининг иккита бекати оралиғида поезд тўхтаб қолгани акс этган видеоёзувлар ижтимоий тармоқларда сиздирилди. «Тошкент метрополитени» ДУК расмий изоҳ берди.

Маълум қилинишича, бугун, 11 январ куни соат 14:55 лар атрофида «Минор» бекатидан ҳаракатланиши лозим бўлган ҳаракат таркибининг вагонларига йўловчиларнинг кириш ва чиқиш вақтлари меъёридан бир дақиқа ортиб кетган. Бу эса ушбу ҳаракат таркибининг бекатдан белгиланган вақтдан кечроқ ҳаракатланишига сабаб бўлган. Оқибатда, ортдан келаётган 69-сонли ҳаракат таркиби белгиланган йўриқномага асосан «Минор» бекатида кириш светофорининг тақиқловчи сигналида икки дақиқа давомида тўхтаб турган.

Олдиндаги ҳаракат таркиби бекатни тарк этганидан сўнг, светофорнинг рухсат берувчи кўрсаткичи ёнган ва 69-сонли ҳаракат таркиби ҳаракатни давом эттирган.