Бугун, 27 октябр куни соат 19:10 лар атрофида Тошкент метросининг «Ўзбекистон мустақиллигининг 30 йиллиги» йўлидаги «Технопарк» бекатига кириб келган 83-сонли ҳаракат таркиби метрополитен ходимлари томонидан текширилганда, йўловчилардан бирининг шахсий буюми қолиб кетгани аниқланган.

Йўловчилар ва ҳаракат хавфсизлигини таъминлаш мақсадида, белгиланган йўриқномага асосан, поезд текширув йўлагига юборилган. Бунинг натижасида йўналишдаги поездлар белгиланган жадвалдан бир муддат кечиккан ҳолда ҳаракатланган.

«Йўловчилардан метро хизматидан фойдаланишда ўз шахсий буюмларига эътиборли бўлишларини яна бир бор эслатиб ўтамиз. Бу метро поездлари йўналишларда белгиланган жадвалга асосан ҳаракатланиши учун асосий туртки бўлаётганини маълум қиламиз» дейилган метрополитен берган хабарда.

Эслатиб ўтамиз, аввалроқ, Тошкент метрополитенида икки кун ичида икки марта поездлар ҳаракaти тўхтаб қолгани ҳақда хабар қилинганди. Бошқа бир ҳолатда эса метрода поезд ҳаракати ярим соатга тўхтаб қолиб, ҳаракат интерваллари узайиб кетганди.