Бугун, 4 ноябр куни ижтимоий тармоқларда Тошкент шаҳрининг Сергели туманидаги аэропорт ҳудудида авиаспоттинг (ҳаво кемаларининг ҳаракатини кузатиш ва тасвирга олиш) билан шуғулланаётган бир нечта бола ҳуқуқ-тартибот идоралари ходимлари томонидан ушлаб кетилгани ҳақда хабар берилганди.

Uzbekistan Airports матбуот хизмати эса ҳолат юзасидан муносабат билдириб, мазкур воқеа туманнинг «Қумариқ» маҳалласида содир бўлганлигини айтганди.

Шундан сўнг, Тошкент шаҳар ИИББ авиаспоттинг билан шуғулланаётган болаларнинг ушлаб кетилганига изоҳ берган.

Айтилишича, шу куни Сергели тумани ИИБга аэропорт яқинида бир неча киши самолётларни суратга олаётгани ҳақида хабар келиб тушган. Воқеа жойига профилактика инспектори бориб, ҳолатни кўздан кечириш чоғида улар 13-18 ёш орасидаги болалар эканлиги аниқланган. Текширувдан сўнг, болалар ва уларнинг ота-оналари ИИБ биносидан уйларига қўйиб юборилган.