Бугун, 25 октябр куни Тошкент шаҳар ҳокимлиги ижтимоий тармоқларда иситиш мавсуми бошланиши ҳақидаги зиддиятли хабарлар фонида шаҳар аҳолисига мурожаат қилди.

Шаҳар ҳокимлигининг маълум қилишича, иситиш мавсумини бошлаш тўғрисидаги қарор «Ўзгидромет» маълумотлари асосида шаҳар ҳокими томонидан қабул қилинади.

Шунингдек, иситиш даври ташқи ҳавонинг ўртача суткалик ҳарорати 8 даражадан паст бўлган 5 кунлик давр тамом бўлган кундан кейин бошланиши, 8 даражадан юқори бўлганда эса тамомланиши кераклиги айтилган.

«Иссиқлик мавсумини бошлаш жиддий ва кўп меҳнат талаб қиладиган жараён бўлиб, биз бунга бор масъулият билан ёндашамиз. Тошкент шаҳри аҳолисини тушуниш ва сабр-тоқатли бўлишларини сўраймиз ва яқин кунларда иситиш мавсуми бошланишини маълум қиламиз» дейилган ҳокимлик хабарида.

Маълумот учун, иситиш даври Вазирлар Маҳкамасининг 2017 йил 15 июлдаги «Коммунал хизматлар кўрсатиш қоидаларини тасдиқлаш тўғрисида»ги 194-сонли қарорига асосан олиб борилади.

Эслатиб ўтамиз, олдинроқ Ўзбекистонда бу йил қишда ҳам аномал совуқ кузатилиши ёки кузатилмаслиги ҳақда «Ўзгидромет» мутахассиси 2023-2024 йилги қиш мавсуми учун об-ҳаво прогнозларини эълон қилганди.